Gobièrnu i instansianan mester yuda hasi kontrol sosial riba Hendenan Grandi

WILLEMSTAD (D)– Gobièrnu i instansianan ofisial, entre kua kompanianan di utilidat mester duna un man den praktika kòntrol sosial pa hendenan grandi den nos komunidat. Esaki por preveni maluso di hendenan grandi. Asina Giselle Coffie, presidente di Fundashon Nos Grandinan a bisa NOBO den un entrevista relashoná ku Dia internashonal kontra di Abusu i Negligensia di Hende Grandi.
Segun Giselle Coffie, internashonalmente abusu di Hende Grando ta tuma luga riba diferente nivel. Na Korsou, esaki no ta un eksepshon. E presidente di Fundashon Nos Grandinan a splika e tipo di abuso ku Hendenan Grandi por konfronta: Ora ku famianan no tin atenshon pa nan Grandinan. Ront mundu tin hende grandi ku tin nan desendientenan, pero e famianan no sa mes ku nan Grandinan tei, pasobra dor di drukte, nan no ta alkansa di tuma kontakto ku nan. Esaki ta un forma di negligensha ku e Hende Grandi por konfronta.
Pa loke ta konserni Korsou, Coffie a bisa ku nos tambe konose e parti di negligensha, tin hende den kas di kuido ku tin anos sin mira nan famia. Tin tambe mayor ku no ta risibi atenshon di su famia. Relashona ku tipo di maltratonan Giselle, ta menshona entre otro: sigiko i mental, kaminda ta intimida un grandi pa por ehempel apodera di su sen. Tambe tin maltrato sosial: tur hende a bandona e Hende Grandi; ora ku e ta un kaminda tur hende ta ignore i no ta duna atenshon, sinta papia kune pasobra e ta hende grandi.
E maltrato patrimonial ku antes tabata pasa hopi na Kòrsou. Pero danki na Fundashon Nos Grandinan, awor hasta bankonan ta pidi un akto notarial. Den pasado e hendenan tabata traha un karta i laga e Hende Grandi firmé, sin ku e sa mes ta kiko ela firma. Esei no ta posibel mas.
Promé ku e Hende Grandi firma, e mester ta di akuerdo, pasobra si e persona ta dementa un tiki, ta ferfelu. Mester tin un konfirmashon ku e hende grandi ta kompletamente na tinu. Den kaso ku un notario ripará ku e hende grandi no ta kompletamente na tinu, e ta manda e persona pa su dokter di kas of spesialista ku por indika e situashon mental di e Hende Grandi ku mester hasi un akto ku ta un otro hende a indike pa hasi.
Den kaso ku e Hende Grandi riba su propio inisiativa ta bai serka e notario i indika kiko e ta desea pa tuma luga, e ta traha e akto i laga e persona firma entre otro un testament òf un volmacht. Ta trata aki di un akto ku kasi similar ku onder curatele stelling, pero den e kaso aki no mester tin intervenshon di hues.
Giselle Coffie a menshona tambe e maltrato finansiero: Famianan ta tuma sèn of apodera di e sen i fin di luna e kas di e Hende Grandi, ta sin lus i no tin kuminda pa e Grandi. Kontrali na antes, kaminda tabatin kòntrol sosial ku bisiñanan ta puntra kiko a pasa, awendia ningun hende no ke mete mas, pa evitá problema. Esei ta pone ku e Hende Grandi ta keda isolá den un kas sukú.
Giselle :”Mi ta opina ku si bisiñanan no por hasi nada, Aqualectra tambe mester kuminsa funshona manera MEO.Ora ku Aqualectra kita koriente di un Hende Grandi, esun ku ta kita e koriente mester puntra e Hende Grandi, dikon e no a paga”. Esei lo por duna klaridat riba e situashon di e grand i determina si ta trata di un eventual kaso di abusu. E informashon aki por pase pa un departamentu spesial di Aqualectra òf pa instansianan manera SVB, Giselle Coffie ta konkluí.