GOBIÈRNU HUNTU KU OK BAND TA LANSA VIDEO “SO FAR SO GOOD”

WILLEMSTAD – November otro aña ‘OK Band’ ta kumpli 35 aña i relashoná ku esaki nan a aserká Minister di Kultura sr. Sithree van Heydoorn pa huntu ku gobiernu promové e kansion “So Far So Good”.
Den kuadro di nan aniversario OK Band a uni un total di 15 músiko, integrante i kantante pa traha algun produkshon nobo di forma ku asina por ranka sali ku selebrashon di aniversario.
OK Band ta bai graba vários piesa nobo i e promé ta “So Far So Good”. E piesa tin komo meta pa stimulá henter pueblo di Kòrsou pa nos ban sigui biba di un forma resiliente i sigui padilanti di forma positivo den e pandemia di COVID-19.
Minister Presidènt sr. Gilmar Pisas huntu ku Minister sra. Dorothy Pietersz-Janga a para ketu na e echo ku mei mei di e pandemia ku tur e problemanan sosial, tòg tin hende ta traha riba positivismo. P’esei ta ku hopi orguyo ta hasi lansamentu di e ‘video clip’ ku tin komo ophetivo pa huntu krea un ambiente positivo den e pandemia di COVID-19.