Gobièrnu di Spaña a aprobá yudansa di 400 euro mensual pa refugiadonan di Ukrania

MADRID – Fernando Grande-Marlaska Gómez minister enkargá ku e kartera di Interior na Spaña a indika ku e gobiernu a aprobá ayera 1 di ougùstùs yudansa di 400 euro pa luna pa tur Ukraniano ku ta aktualmente den nan pais.
Ta trata aki di un yudansa mensual ku lo dura solamente 6 luna te na momentu ku e Ukraniano buska un trabou of stabilisá permanentemente.
Fernando Grande-Marlaska Gómez a splika ku pa kada yu tin ménos ku 18 aña e famia Ukraniano lo haña 100 euro èkstra.
Magdalena Valerio Cordero direktora di MISSM (Ministerio de Inclusión, Seguridad Social y Migraciones) a bisa ku gobiernu di Spaña a duna lus bèrdè via un dekreto pa yuda un total di 130 mil Ukraniano ku ta aktualmente na Spaña.
Tin indikashon ku via un dekreto gobiernu a haña 52.8 mion euro pa yuda e grupo di Ukraniano nan aki ku sikiera por haña algu di yudansa finansiero.
Mayoria di e Ukraniano nan ku ta na Spaña a splika ku nan ta usando nan último rekursonan ku nan a logra saka for di banko i hopi di nan ta risibiendo yudansa di familiarnan ku ta radika na otro partinan di Europa.