Gobiernu di Maduro i Chevron a firma kontrato pa kontinuá ku produkshon petrolero

CARACAS – E gobiernu di Nicolás Maduro i e empresa petrolero merikano Chevron a firma ayera vários kontrato na e ofisina prinsipal di PDVSA na Caracas.
Esaki ta nifiká kontinuashon di produkshon konhunto di petrolio na Venezuela loke ta un alivio despues ku atministrashon di Biden a kita sanshon ekonómiko.
Tareck el Aissami Minister enkargá ku e kartera di Petrolio na Venezuela huntu ku Asdrúbal Chávez presidente di PDVSA i Javier La Rosa presidente di Chevron tabata esnan ku a firma e kontratonan.
Javier La Rosa a deklará despues di a kaba di firma e kontratonan ku tin bastante trabou pa bai hasi pero promé ku tur kos mester para ku tur spekulashonnan.
Vários medio di komunikashon na Venezuela mes a informá ku PDVSA lo no keda kompensá debidamente.
Esaki segun Javier La Rosa no ta kuadra ku realidat ya
ku PDVSA lo bai haña di kada dòler $0,70.
Esaki ta nifiká ku Chevron lo bai forma parti di un sosiedat stratégiko na Venezuela ku ta konsistí di kuater empresa miksto.
E empresanan ta Petroboscán i Petroindependiente na estado Zulia, Petropiar i Petroindependencia na Faja Petrolífera del Orinoco kaminda tin e reservanan petrolero di mas grandi na Venezuela.