Gobiernu di Bolivia: Ta ninga oferta di Bolsonaro ku a ofresé asilo na Jeanine Áñez na Brasil

LA PAZ – Luis Arce presidente di Bolivia a rechasá ayera e proposishon di presidente brasileño, Jair Bolsonaro ku kier a otorgá asilo polítiko na eks presidente interino Jeanine Áñez.
Ta konosí ku Jeanine Áñez a keda kondena na 10 aña di kastigu di prizon pa motibu ku ela tuma mando di presidensia despues di un gòlpi di estado kontra Evo Morales na 2019.
Rogelio Mayta minister enkargá ku relashonnan eksterior na Bolivia a deklará ku lokual Jair Bolsonaro ta hasiendo ta un falta di rèspèt kontra di hustisia Boliviano.
Jair Bolsonaro ta buska manera pa duna Jeanine Áñez ku ta un konvikto pa hustisia ku un asilo polítiko.
Bolsonaro a deklará for di komienso di e siman aki ku elo bai hasi tur lokual ta na su alkanse pa yuda Jeanine Áñez ku a keda enkarselá inhustamente na Bolivia.
Jeanine Áñez a manda gradisí Jair Bolsonaro pa e gesto pero a bisa ku elo hui for di su pais pa motibu ku e ta inosente i lo bai buska su derecho na Korte Internashonal.