Gobiernu Colombiano a konfirmá ekstraditashon di ruman di Piedad Córdoba pa Merka

BOGOTA – Ayera gobiernu di Colombia a konfirmá e resolushon di ekstraditashón di Álvaro Córdoba Ruiz kende ta keda pidi pa hustisia merikano pa trafikashon di droga.
Wes Myriam Ávila a deklará ku no tin ningun otro opshon sino ku mester ekstraditá Álvaro Córdoba Ruiz ruman di Piedad Córdoba pa Merka. Abogadonan ku tabata representá Álvaro Córdoba Ruiz a trata na hasi lo máksimo pa evitá su ekstraditashon pero na final wes di korte di hustisia na Colombia no tabatin otro opshon sino pa ekstradite pa Merka.
Ne momentunan aki Álvaro Córdoba Ruiz ta enkarselá den e prizon La Picote i ku posiblemente lo keda ekstraditá e siman aki mes pa Merka.
Ne momentunan aki tur dokumento di departamento di hustisia a keda manda pa presidente Gustavo Petro firma ku finalmente agentenan di DEA lo por bin busk’é i transladá Álvaro Córdoba Ruiz pa un sentro di detenshon na New York.
Álvaro Córdoba Ruiz ta keda akusá di labamentu di plaka, trafikashon di droga i arma di kual hustisia merikano tin años ta sigi su pasonan.