Gobiernu a tuma desishon pa nombra notario nobo i hefenan nobo di kuerpo polisial Kòrsou

WILLEMSTAD. Riba petishon di Minister di Hustisia, Konseho di Minister a bai di akuerdo pa apuntá señora mr. Cornelia A.P. Thesseling-Baaten komo notario.
Riba petishon di Minister di Asuntunan General, Konseho di Minister ta bai di akuerdo pa hasi un petishon na tur ministerio pa tuma e pasonan nesesario pa hasi posibel ku klientenan por hasi uso di tualèt den e establesimentunan di gobièrnu kaminda ta ofresé servisio na públiko.
Riba petishon di Minister di Hustisia, Konseho di Minister ta bai di akuerdo pa outorisá e abogado general di Kòrsou pa – na nòmber di Kòrsou – yega na un kòntrakt pa tempu indefiní kaminda ta ofresé asistensia hurídiko na personan di ménos rekurso, ku e siguiente abogadonan:

· Sra. Jo-Anne L.M. de Wind
· Sr. Roberto B.K. Polsbroek
· Sr. Artoir C. Herrera
· Sra. Bernice J. Rollings
Den e kuadro akí a bai di akuerdo tambe pa presentá e dekreto nashonal den konsepto na Gobernador pa firmá.
Konseho di Minister ta bai di akuerdo ku kontenido di e lei den konsepto ku a inisiá i ta akordá pa trese kambio na e lei di karetera i tráfiko i pa presentá esaki na Gobernador pa firma.
Konseho di Minister ta bai di akuerdo ku kontenido di e raportahe interino di Reino Ulandes enkuanto e Tratado pa eliminá tur forma di diskriminashon di rasa (CERD), ku aporte di Kòrsou.
Konseho di Minister ta bai di akuerdo ku kontenido di e di shete raportahe periódiko di Reino Ulandes enkuanto:
· e Tratado pa eliminá tur forma di diskriminashon kontra hende muhé (CEDAW) ku aporte di Kòrsou;
· e Tratado ku ta enserá leinan ekonómiko, sosial i kultural (ESOCUL) ku aporte di Kòrsou.
*Konseho di Minister a aprobá pa bai di akuerdo ku aporte di Kòrsou manera indiká den e “Human Rights Report 2022”.
8. Riba petishon di Minister di Hustisia, Konseho di Minister ta bai di akuerdo pa apuntá:
· sr. E. Sambo komo “Hoofd Bedrijfsvoering” di Kuerpo Polisial di Kòrsou;
· sr. R. Ellis komo “Korpschef” di Kuerpo Polisial di Kòrsou.