Giselle Mac William disponibel pa bira lider nobo di MAN

WILLEMSTAD – Den kaso ku su partido hasi apelashon riba su sentido di responsabilidat, Giselle Mac William lo kumpli i asumi liderzago di Partido MAN. Asina por konklui for di deklarashon di e parlamentario a bisa awe mainta den Tribuna Popular na Radio Hoyer.
Mac William a bisa ku su partido no informe ku lo tin kambio di liderzago dje partido na kaminda. ‘’Direktiva no a informa mi ni tampoko mi lider politico a partisipa mi esei’’. Segun Mac William, esei ta nifika ku te ku asina leu ku e ta maneha informashon ku e tin, por lo pronto Steven Martina ta lider di partido MAN. E parlamentario a indika ku frakshon di MAN den parlamento ta trahando 1 aña ku otro ku hopi satisfakshon. Steven Martina ta un sosten grandi pe den Parlamento, e parlamentario ta bisa.Pa loke ta trata su konosimentu, su maneranan kon e ta mira topikonan. Mac William:”’Mi mester bisa ku último lunanan mi a sina masha tantu Ii mi ta gradesido ku mi tin un hende dje kaliber ei banda di mi den parlamento’’.

DISPONIBEL
Riba e pregunta spesifiko di Tribuna Popular, si Guiselle ta disponibel pa asumi liderzago di MAN, den kaso ku Steven Martina disidi di bai, Mac William a kontesta:
‘’Mi a sali for di un famia politiko, kaminda ku sigur aspirashnnan pa por ta lider den bo pais. Pero mi no mester ta lider di un partido politiko, pasobra tur dia mi ta sinti mi lider den e komunidat aki pa kontribui’’. Mas aleu ela indika: ‘’Si mi ta na disposishon? Meskos ku tabata e kaso pa bira minister di Desaroyo Ekonomiko, ku no tabata mi anhelo, pero ma karga mi responsabilidat, pa mi pais i pa mi partido.
Kualke reto, ku mester bin dilanti pa mi por yuda karga responsabilidat di mi pais i mi partido nan sa ku semper por konta ku mi pasobra responsabilidat ta parti di mi ser’’.
KONGRESO

Dia 4 di juni awor, partido MAN ta tene su kongreso, na unda ta eligi un direktiva nobo.
E aktual presidente, Yves Schoop, lo no regresá komo presidente, pasobra ela presidi direktiva di Partido MAN, durante di dos period, ku ta e termino máksimo.