Gilmar Velder, Manager: “Nos a selebrá manera ta kampeon”.. …Marchena-7, Wild Cats-0..

Marchena Braves a logra e promé sorpresa grandi di temporada ayera nochi ganando di Wild Cats/KJ74/Guardian Group 7-0. 5 Star a kombersá ku e manager di Marchena Braves ku ta Gilmar Velder ku tabata super kontentu despues di e triunfo.
E la rekonosé ku nan a selebrá manera ta kampeon di Kòrsou nan a bira.
E la agregá ku ta bai tin mas triunfo si. Marchena Braves a hiba un bon preparashon i kosnan a kuminsá bon pa nan ayera.
Eldrion Regina ta e presidente nobo dje tim, i nan ta kuminsá nan aktuashon ku un triunfo sin duda dushi di 7-0 riba e kampeon di Kòrsou ku ta Wild Cats. E rumannan Ryson i Rainer Polonius kada un a empuhá 2 kareda, i Issachar Pereira tambe a empuhá dos pa yuda e tim di Marchena Braves ofensivamente. Frank Mustinla a habri tira 3 inning sin duna kareda.
A sigui Luis Alvaro Salazar ku 1 inning i Raydjen Rosina a bai 4.1 di innng, tambe sin duna kareda pa yuda e tim gana e wega.
I e mes a Sali e pitcher ganadó.
Richard Moesker a bin saka e último dos outnan pa su ekipo.
E tim kampeon di Kòrsou a habri ku Geriyon Jakob ku a tuma 5 kareda den 3.1 di inning, e la karga ku e derota. A sigui: Kennimar Leocadia i Gavinee Virginie. Ryson Polonius a bati di 3-2, ku 2 anotá, i 2 empuhá pa Marchena. Ray Michel a bati di 4-2 pa Wild Cats.