Gilbert Ricardo: No ta berdat ku mayoria trahadó ta ekstranhero: Kontrol ayera na Courtyard by Marriot por perhudiká e proyekto i Kòrsou

WILLEMSTAD -A keda proba ku kontrali ku loke ku inspektor di SBAB a informa ku ayera a deskubri varios trahadó illegal na e proyekto Courtyard by Marriot, no ta berdat.

Asina Gilbert Ricardo, desaroyadó di e proyekto a bisa awe mainta na Radio Mas.

Den kuadro di kòntrolnan rutinario riba trabounan di konstrukshon, ayera un Team Multidisiplinario a bishita e konstrukshon di Courtyard by Marriot na Rif. Den deklarashon pa medionan di komunikashon ku tabata presente durante dje kontrol, Inspektor Angelo Pichardo di Stichting Belastingaccountantsbureau (SBAB) a bisa entre otro ku tin un fenomeno nobo kaminda ku kolombianonan ta drenta Kòrsou ku visa turistiko i ta bai traha den konstrukshon.

Aparentemente ayera esei tambe tabata e kaso.

Segun Angelo Picardo a trata di un kantidat konsiderabel di trahado illegal ku e outoridatnan a deskubri.
Segun Gilbert Ricardo, ta bon ku kòntrol a tuma lugá, pasobra mester tin kontrol riba e tipo di trabounan asina. Pero mester tene kuenta ku otro faktornan, na momentu di eherse e investigashon.

Ta importante segun Riardo, pa tene na konsiderashon ku mientras ku no tin resultado dje investigashon, e outoridatnan mester limitá nan mes na hasi dekarashon ku despues por resulta ku e no ta kumbini ningun hende.

‘’E por afektá e proyekto i tambe desaroyo di Kòrsou’’.

Pa e proyekto ta serka akuerdo ku kontratistanan pa hasi e trabou. Ta trata di kompanianan ku ta inskribi na Kamara di Komersio.

Tin bia por resulta ku e kontratistanan ei tin mester di sierto trabou for di eksterior pa trabounan spesialisa. Pero no ta manera a bisa ayera, ku ta mayoria di e trahadonan ta ekstranhero. Ricardo: ‘’Esei no ta berdat”.
Mester tene kuenta tambe ku un tipo di proyekto asina ku ta grandi pa Kòrsou , ku no ta realisa un proyekto asina sin tene kuenta ku regla. E proyekto ku tin e branding di Courtyard Marriott, tin hopi eksigensia. Tampoko no ta trata di un kas of edifisio normal, ta un proyekto grandi ku ta rekeri hopi atenshon.”
Informashonnan ku Gilbert Ricardo a risibi serka su partnernan den e proyekto di Marriott, ta resulta ku den e proyekto ayera tabatin 150 hende ta traha. Di e kantidat aki mas ku mitar ta yu di Korsou, sobra personal no ta nase na Korsou i mayoria di nan tabatin nan papelnan. Pa loke ta e trahadonan ku outoridatnan a laga bandona e sitio pa medio di busnan, ta algu masha normal segun Ricardo: ‘’Pasobra ora ku e team di kontrol yega i bo no tin bo papelnan huntu bo, nan ta hinka bo den bus i bai kubo.’’ Esaki ta pa verifika ku e papelnan ta na ordu. Esei, segun e desaroyado ta e manera ku gobiernu ta traha.
Ricardo ta lamenta ku den e kaso di ayera tabatin show i fanfare ekstra durante dje kontrol . Outoridatnan ayera a bai ku 25 hende. Di e kantidat aki, segun Ricardo, tabatin 21 trahado por a bai i 4 a keda pa mas investigashon tuma luga.