Gilbert Doran: Rekomendashon pa instalá un Raad van Volksgezondheid

WILLEMSTAD. Otro punto ku e parlamentario Gilbert Doran a trese dilanti ta ku ta mas ku lógiko ku un ‘Raad van Volksgezondheid’ ta hasiendo falta den nos komunidat, manera tabata e kaso te ku 10-10-10.
Pues esaki no ta algu kompletamente nobo, ya ku despues di e fecha aki, a hasi kambionan importante pa ku e lei en kuestion, pero tòg nunka mas ni a re-introdusí esaki.
Un ‘raad’ kargá ku profeshonalnan studiá i doktorá den medisina i salubridat públiko di un pueblo, pa asina yuda konsehá i sostené Minister den e tarea fuerte aki.
Hasiendo uso di su derecho pa hasi pregunta na minister, ela manda e sigiente preguntanan pa Minister Pietersz- Janga:
Kiko ta e motibu ku no ta hasiendo uso di e ‘BIG wet’ manera mester ta?
Komo Minister enkargá ku Salubridat Públiko, kon otro Minister ta kere ku por atendé ku e ‘BIG wet’ aki?
Kiko ta e motibu pa kua nos ta pèrmitiendo dòkternan di kas ehersé ku solamente un diploma básiko di medisina?
Minister ta na altura di e gravedat i riesgo asina haltu ku e dòkternan di kas aki ta trese pa salú di nos pueblo?
Minister ta komprondé i aseptá ku esaki ta algu ku asta diskriminatorio pa esun ku si a studia tur su añanan pa por ehersé manera mester ta den su profeshon?
Pa ki motibu no a lanta un ‘Raad van Volksgezondheid’ ku e meta pa duna un man pa ku e labornan bastante kargá ku ya nos isla ta konfrontando kuné?
Kiko tabata e motibu pa kua no a reintrodusí e lei pa ku un ‘raad’ nunka mas?
E último aki no ta un pregunta, sino un humilde sugerensia pa por fabor reinkulká un grupo di sosten pa ku salú públiko, formá pa profeshonalnan di nos mes isla, i si ta bon, asta di eksterior ku ta dispuesto i disponibel pa duna un man pa ku e tópiko aki.
E parlamentario ta spera di risibí kontestanan alentador pa ku e tópiko ariba menshoná.