Gerrit Schotte pa medio di huisio sumario a hiba Orco Bank dilanti

WILLEMSTAD – E konosido Gerrit Schotte a hiba e banko kaminda e tin su kuenta dilanti. Ta trata aki di Orco Bank.
Tur kos a kuminsá for di kaso Babel kaminda ku Gerrit Schotte a risibí kondena pero ku durante di esaki mes ministerio públiko a entamá un kaso di ekspropiashon konta di dje kaminda nan ta pidi pa Gerrit Schotte paga estado bek e plakanan ku ela risibí di un forma ilegal. Ta trata aki di un suma di 1.844.934 florin.
Schotte a yega te kasashon ku e sentensia aki pero no por a gana i e mester paga e suma aki sino e ta bai sera pa 3 aña. Ministerio públiko na 3 okashon a manda karta pa sr Schotte pa pidiele pa e bin paga e plaka aki kual e no a duna oido. E ora ey a bin e karta ku e deadline aden kaminda si Schotte no kumpli denter di 10 dia e lo kai sera.
Esaki a pone ku Schotte riba su facebook a hasi un apelashon na pueblo pa yude ku donashon p’asina e por paga e suma aki.
Ela hasi menshon di su number di kuenta ku e tin na Orco bank kual kuenta e tin esaki for di 2008.
Esaki a pone ku e ta risibí donashon riba e kuenta aki. Orco Bank di su parti a tuma nota i a disidí di blòkia e asuntu di donashon aki.
Esaki a pone ku Geritt Schotte a disidí di bai korte pa korte obligá e banko pa desblokea su kuenta pa e por sigi risibí donashon.
Durante di e kaso abogadonan di Orco Bank a argumentá ku e banko tin regla i tambe mester mantené nan mes na reglanan ku tin kontra di nan. Anto esaki ta e asuntu di plakanan ku por keda laba. Pues banko no por risibí plaka prosedente di mundu kriminal .Banko ta haña ku nan no por bai kontrolá tur e sumanan ku ta drenta aki riba e kuenta di Schotte pa sa ku ta trata aki di sumanan prosedente di mundu kriminal. Anto pa evitá ku e kos aki por bira problema pa nan , mesora nan a disidí di blòkia e kuenta e ora ey pa risibí plaka.
Si nan ta duna di konosé ku Geritt Schotte por risibí su salario i tambe por hasi su transakshonnan normal .
Wes a duna ámbos partido te ku dia 23 di mei pa wak si nan por yega na un solushon den e kaso aki i si nan no yega na un solushon e ora ey e ta kontinuá ku e kaso aki.
Geritt Schotte entretantu mester avisá riba su facebook pa hendenan stòp di depositá mas plaka riba su kuenta.
Esaki te ora pa wak na ki solushon ta bai yega.