Gabinete Pisas tin ku stòp di manipulá, tira falta i asumí su responsabilidat

WILLEMSTAD. Ya ta vários biaha ku Minister Silvania riba retnan sosial ta insinuá ku e 12.5% ta wantá serka Parlamento, ya ku e lei di “normering topinkomens” no a wòrdu tratá dor di parlamento.
El a asta bisa sindikatonan ku ta Parlamento tin nan 12.5% wantá. Esaki ta nada mas ku un manipulashon i tiramentu di falta.
Pa e motibu ei ta nesesario pa refreská memoria di Minister i nos komunidat.

Gabinete Pisas a aseptá pa Konseho di Minister di Reino a mara e 12.5% na lei di topinkomens!
Na promé lugá, den e lei pa e 12.5% ku “Gabinete anterior” a presentá basá riba eksigensia di Hulanda pa solidaridat i finansiamentu di likides durante pandemia, fin di e 12.5% ta basá riba un desishon di Gobièrnu di Kòrsou.
Ningun momentu esaki tabata mará na lei di “topinkomens”.
Ta Gabinete Pisas ta esun ku a anunsiá dia 30 di mei último, ku Sekretario di Estado Van Huffelen a mara finalisashon di e 12.5% na e lei di topinkomens, NO gabinete Rhuggenaath.
Apesar ku Parlamento a bisa den un moshon ku esaki NO ta korekto, klaramente Gabinete Pisas a aseptá e kondishon aki, te ku awor Minister Silvania a pidi pèrmit por eskrito na sra Van Huffelen pa kambia e kondishon.