Fundashon Sentro di Bario Soto ta satisfecho ku logronan i desaroyonan

Willemstad, – Fundashon Sentro di Bario Soto ta mira bèk riba 15 luna di trabounan intensivo durante kua a logra hopi pa e sentro i tambe varios gestonan sumamente bunita i importante ku ta yuda den plannan ku tin pa ku e lokalidat. E sentro aki ta di gran importansia pa e aspekto sosial i kultural di habitantenan di e área aki di Banda Bou i e direktiva ta satisfecho ku e progreso ku tin te ku awor.

Un di e gestonan ku sigur a amplia e posibilidatnan na e lokalidat aki ta e aporte di kompania di telekomunikashon FLOW. E kompania, aparte di brinda konekshon di internèt grátis, a sòru resientemente pa fortifiká e Sentro di Bario su konekshon aun mas pa e yega na tur parti di e edifisio i asina optimalisá e uso di esaki. Sentro di Bario Soto awor tin e posibilidat pa organisá aktividatnan adishonal manera tayernan pa instruí riba uso di teknologia i mas.

Den preparashon pa e proyekto boluntario di CuraDoet 2022 dia 20 i 21 di mei próksimo, nos ta kòrda bèk riba temporada di CuraDoet 2021, durante kua e tim di FLOW a bini ku un delegashon pa duna un man ku diferente trabounan. Nan a trese un kambio den interior di e edifisio hasiendo un impakto positivo riba e esfera i tambe den kurason di tur esnan ku ta hasi uso di e lokalidat aki.

Na nòmber di e tim di Sentro di Bario Soto, habitantenan i tur usuario di e sentro, Fundashon Sentro di Bario Soto ke yama masha danki na FLOW pa ekstendé boso man i yuda nos durante di e temporada ariba menshoná. Sigui ku e bon i bunita trabounan, i tur klase di éksito.

Na pueblo di Banda Bou i tur ku ta bishitá e dushi parti aki di nos isla, keda pendiente pa muchu mas ku Sentro di Bario Soto lo trese! Nos ta topa na Soto!