Fundashon Kòrsou Na Kaminda Pa Libertat ta sensurá prolongashon kontrat pa FOL Hato

WILLEMSTAD. Salida di FOL lo habri tremendo oportunidat pa desaroyo ekonómiko pa Kòrsou na nos Aeropuerto.
Fundashon Kòrsou Na Kaminda Pa Libertat a keda sorprendé dia nan a lesa ku Gabinete Rhuggenaath/Martina a bai di akuerdo ku Hulanda pa ekstendé e kòntrakt ku Estados Unidos i pa Estados Unidos sigui operá e base Forward Operation Location (FOL), aki na Kòrsou pa 5 aña mas.
E tratado entre Reino Hulandes i Estados Unidos ku ta regla akseso i uso di fasilidat na Antia Hulandes i Aruba pa Estados Unidos, den e lucha pa kombatí droga for di aire, tin stipulá ku ora e akuerdo terminá por traspasá e fasilidatnan di FOL na Hato pa Gobièrnu di Kòrsou.
E base di FOL ku su plataformanan pa stashoná avion di transporte grandi, den un funshon sivil, por sirbi komo un terminal ideal pa karga i deskargá avion di karga grandi.
Un terminal pa avion di karga ta di sumo importansia pa desaroyá Kòrsou komo un hùp logístiko pa Karibe i Latino Amérika.
Sigur ora nos konsiderá ku e Zona Franka na Hato ta bisiña di e base di FOL.
Huntu nan 2 ta forma un kombinashon ideal pa desaroyo di un hùb logístiko.