Fundashon BON INTENSHON CIFFR 2022

WILLEMSTAD – Despues di deliberashon, Fundashon Bon Intenshon a disidí di kanselá CIFFR 2022. Ta un desishon difísil atrobe. E desaroyo di COVID-19 no ta permití nos organisá pa ta huntu den un espasio será kaminda tin un multitut bastante grandi ta move.
Organisashon di CIFFR ta konsiente ku lo tin hopi hende desapuntá, ku pa di 3 biaha e festival di sine no ta sigui. Ta mas ku normal, ku CIFFR, wetando e karakter di e festival akí, lo mester evaluá e festival den su totalidat.
Nos lo trata mas den aña, tumando den konsiderashon e medidanan, ku por hasi algu mas chikí i di por presentá pelíkulanan arthouse i mas edukativo. Klaro ku esaki mester tuma lugá, despues di kòmbersá ku e mundu di enseñansa, ku The Movies i tambe ku e tim di spesialista i médikonan.
Den kuadro di e Challenges Film Project , Anja van Bergen a traha 3 short film ku hóbennan i Fundashon Bon Intenshon ta masha orguyoso di esaki. E hoyanan akí: Fo’i Chikí un soño, Mi Lucha i 1.83, ta traha ku un smartphone. Asina ku situashon permití esaki, nos lo pasa e pelíkulanan akí den Teatro Luna Blou.
Pa amantenan di sine lo tin posibilidat tòg pa gosa di algun pelíkula.
Den 2022 IFFR lo tuma lugá online, di 26 di yanüari te 22 di febrüari 2022. Atrabes di IFFR.com, públiko lo haña un selekshon di pelíkula online weta i tambe IFFR Talks. Den e selekshon lo tin entre otro pelíkulanan di e Tiger Competition, Big Screen Competition I Ammodo Tiger Short Competition. Pa mas informashon, bishitá IFFR.com.