Fundashon Air Clean Everywhere ta hasi un petishon irasonabel na hues

WILLEMSTAD – Representante di e sindikatonan ku ta representá personal di Refineria, a sali ku sentimentu miksto for di tratamentu dje kaso den korte di Fundashon Clean Air Everywhere kontra di gobièrnu. E kaso ta relashoná ku normanan di medio ambiente ku mester ta konta pa Refineria ora ku e ta operashonal atrobe.
Gherrel Remilia presidente di sindikato APRI a deklará ku e sindikato tabata ke haña un indikashon kiko presis e intenshon ta di Clean Air Everywhere.
E sindikalista ta bisa ku ela haña e prueba ku loke ku e Fundashon ta pidi hues ta un petishon irasonabel . ‘Nos tur ta konsiente ku e aspekto di polushon ta importante i nos tur ta spera ku mester yega na un kaminda ku e polushon ta menos kompará ku antes’. Pero, segun Remilia, e proseso aki ta mará na tempu i tambe sèn. Loke ta bai tuma tempu pa alkansa, e lider sindikal ta sigi bisa.
Durante dje kaso, e abogado di gobiernu a bisa ku lo dura sigur 3 aña pa yega na start e refineria den kaso ku mester kumpli ku tur e eksigensianan di Clean Air Everywhere.
Na opinion di Remilia, lo dura mas tantu ku tres aña, mientras ku e invershon lo ta hopi kuantioso.
Banda di esei ningun kompania lo no ta interesa pa hasi e invershon ei. Esei ta nifika ku e refineria na Korsou ta sera. Ta pesei, segun e presidente di APRI, tin un dekreto ministerial tokante dje normanan, ku mester atende i hasi algu na dje.
Alcides Cova presidente di SGTK, ta bisa ku tur hende ta di akuerdo ku tin norma ku mester kumpli kune i ku tur hende ta di akuerdo ku ora ku kuminsá opera, ta bai tene kuenta ku no ta bai kuminsá kima e asfalt pero ku ta fuel oil ta bai kima. Cova ta optimista ku hues ta bai tene kuenta ku e hecho, ku tur loke ta posibel lo hasi pa garantisá un situashon positivo i ku e kaso lo ta na fabor di gobièrnu.