Frida i su mama Alejandra Guzmán a kuminsa komunika

Porfin e mama i yu a disidí na laga nan problemanan den pasado i a kuminsá trata na drecha nan relashon. Aki nos ta referí na e aktris Alejandra Guzmán i Frida Sofia ku ya tin un tempu tabata den diskushon formal i sakando ‘paña sushi’ di otro den medionan sosial.

E diskushonnan di mama ku yu a bai asina leu ku na vários okashon tur dos a anunsiá di preferá na sigui nan bida separá asina evitá mas bèrgwensa públiko.

 Pero resientemente ora ku a sali videonan di salú dje kantante Alejandra Guzman ku a resultá positivo di covid-19. Tabata spekulá ku e kantante di “Hacer el Amor con Otro” no ta rekuperando di e malesa i esaki a pone ku Frida Sofia a kuminsá preokupá pa salú di su mama te ku e la tuma e kurashi pa yam’é.

 Frida a keda mas trankil sabiendo ku su mama ta muchu mas mihó ku e tabata parse riba e videonan. Esaki por tabata un bon esküs pa e relashon entre e yu i su mama re-establese, despues ku nan a hasi hopi daño na otro i nan mes.