Frakshon di PAR ta pidi minister klaridat riba uso di Coronatest

WILLEMSTAD. Frakshon di PAR a mnda un karta pa minister di Salubridat señora Pietersz-Janga puntrando dje posibilidat si siudadanonan por kumpra Coronatest.
E parlamentario di PAR, Zita Leito, a splika ku ront mundu a habri e posibilidat pa e siudadano por kumpra coronatest.
E coronatest ta un test ku por usa na kas mes, pa si e siudadano kier test su mes na momento ku e tin un sintoma di corona of si e kier sinti su mes mas sigur ora e ta bai di bishita serka un hende grandi.
Personanan ku ta kompletamente bakuna of ku a haña COVID den pasado tambe ta i por hasi uso di e test aki.
Na Aruba i otro paisnan por kumpra e coronatestnan aki den botika.
Ta lamentabel ku na Korsou ainda no tin e opshon aki pa e siudadano.
Segun informashon e parlamentario lo ta dispone di dje, e coronatest na Korsou a keda registra bou di reglanan/leinan estrikto similar na remedi, esaki ta pone ku tin un restrikshon severo pa e tipo di testnan aki.
Den e kategoria aki ta kai tambe por ehempel e test pa detekshon tempran di embaraso. Den komienso di aña 2021 asta tuma algun test bou di embargo.
Apesar ku e coronatest lo no fungi komo un diagnostiko ofisial, e siudadano di Korsou mester por hasi su mes test si e ta desea esaki. Siudadano nan ku e parlamentario a kombersa kune ta indika ku na momento ku nan ta sinti sintoma di ferkout of di COVID-19, nan lo kier test nan mes, prome ku nan bai pasa henter e proseso di PCR, asina nan por tuma e prekoushonnan nesesario ku mas rapides. Prekoushon manera isolashon. Awor ku Korsou ta den preparashon pa e variante di COVID-19 Omicron, e coronatest por ta un instrumento pa detekta mas kaso i tambe posibelmente baha e kontagio. Den kuadro di esaki e parlamentario a puntra e minister si e por fasilita Parlamento, si ta kuadra ku coronatest ta keda registra, bou di reglanan di kontrol similar na remedi.
Tambe si e minister por informa Parlamento kua ta e kriterianan pa ku importashon i benta di coronatest i si akaso ta posibel pa un persona, pa uso personal trese coronatest for di eksterior.
I finalmente e parlamentario a puntra si e minister por informa Parlamento, kon e tim di maneho lo informa komunidat tokante e forma di uso korekto di e coronatest.