Frakshon di MAN a entregá proposishon di lei despues di Konseho di Raad van Advies

WILLEMSTAD. Resientemente frakshon di MAN a entregá e proposishon di kambio di lei den den ordenansa di sueldo minimo despues ku a hasi e kambionan nesesario konforme konseho di Raad van Advies.
Na òktober 2020 e lei a bai pa SER i RvA pa konseho.
Aktualmente den e lei ku ta regla tarifa pa suèldo mínimo tin diferente tarifa di mará na edat a base di porsentahe.
Un persona ku tin 20 aña ta kobra 90% di e tarifa di suèldo mínimo, 19 aña ta 85%, 18 aña 75% i 17/16 aña ta kobra 65%.
Si aproba e proposishon un persona for di su 18 aña ta kobra 100% di e tarifa di suèldu mínimo ku lei ta preskribí pasobra un persona for di 18 aña bai ariba pa lei ta un mayor di edat.
Komo tal e ta haña e derechi di por atendé tur su kosnan legalmente su mes sin mester di outorisashon di entre otro su mayornan.
Segun International Labour Organization (ILO) tur hende ku ta laborá mester risibí pago igual pa trabou igual (equal work, equal pay).
Tambe un persona ku tin 18 aña ku ta laborando tin e mesun derechinan ku esun di 21 aña i no ta konosé diferensia entre gastunan di kosto di bida.
Frakshon di MAN ta dispuesto pa sinta ku Minister di SOAW pa deliberá riba e proposishon di lei ku nan a presentá i nan ta ku e kambio aki lo karga sosten di parlamento mirando ku esaki ta trese igualdat den pago di salario na e trahadó.