Fraccion di MAS hopi critico riba presupuesto 2021 No por t’asina cu riba pueblo ta wordo corta y Gobierno na su turno ta amplia Ministerio

ORANJESTAD-Den sala di Parlamento di Aruba a cuminsa cu tratamento di e presupuesto di pais Aruba pa aña 2021. Lider di fraccion di partido MAS, sra. Marisol Lopez Tromp a enfoca riba e preocupacionnan cu tin den pueblo pa loke ta personal den e departamentonan di Gobierno.

Ora sra. Lopez Tromp a yega trabou mainta, el a wordo enfrenta cu un grupo di werksters hopi preocupa cu nan lo por perde nan trabou.

E Parlamentario a scucha tur nan preocupacionnan y a cumpli cu nan peticion pa papia den nan nomber durante e reunion di Parlamento.

Presidente di Parlamento, Edgard Vrolijk a sera e lista di orador, mientras cu varios miembro di Parlamento tabata scuchando e grupo preocupa dilanti edificio di Parlamento, cual ta algo di lamenta.

Sra. Lopez Tromp den su disertacion durante prome tanda, a haci pregunta riba e asunto di personal y riba e presupuesto di pais Aruba, mirando e hecho cu Minister Presidente a firma pa un landspakket aña pasa, pero cu e no ta mira esaki refleha den e presupuesto bek.

Tambe a haci pregunta riba varios preocupacion den nos comunidad, manera e parti di medio ambiente, nos muchanan, abuso sexual y kico Gobierno ta bay haci pa combati esaki.

Fraccion di MAS a dedica atencion na tematica di e ley cu ta encera e reparticion di cartera di e diferente Ministerionan, mirando cu no tin claridad ainda y no por exclui cu Formador lo bay aumenta e cantidad di Ministernan na 8 of 9.

Esaki dor cu den e formacion solamente tin 2 partido enbes di 3 manera tabatin gobernacion ultimo.

Sra. Lopez Tromp a finalisa bisando cu no por t’asina cu riba pueblo ta wordo corta y Gobierno na su turno ta amplia ministerio.