For di su lantamentu tabata difisil pa Giro funshoná bon

WILLEMSTAD – Presidente di Banko Sentral,Richard Doornbosch, awe mainta a duna un presentashon durante di e reunion di parlamento riba e situashonnan ku a kondusi na kaimentu di Girobank.
Doornbosch a bai brevemente riba e situashon prome ku Girobank a sera. Durante di un temporada largu a purba haña solushon pa skapa e banko i tene na bida. Finalmente esei no a logra.
Na 2010 tabatin un momentu hopi importante ora ku un akshonista nobo di Girobank a presenta, tabatin un oumento rapido dje problemanan te ora ku na 2013 Banko Sentral a pidi yudansa tuma medida. For di 2013 te ku 2019: a kuminsa un buskeda i papia ku varios partido pa wak si por yega na un solushon. Pero na fin di 2019, tin un perdida asina grandi di perdida di konfiansa ku no a keda otro solushon pa deklara e moratorio i wak kon por duna esnan ku tin sen na Girobank por haña nan sèn bèk.
HISTORIA
5 di maart 1996 a funda Girobank. Segun e presidente di Banko Sentral, for di kumnsamentu tin difikultat pa yega na un banko ku ta funshona bon. ‘E maneho di kredito no ta adekua.E gouvernance for di komienso no ta bon, no tin bon oudit interno. I seis aña despues esei ta kondusi na ehekushon di un areglo di emergensia dor di Banko Sentral na desember 2020.
E problema di solvabilidat na e momentu ei no ta hopi grandi. Ta mas o menos 20 mion florin. Ta logra pa interesa dos akshonista nobo pa deposita kapital, en total mas o menos 25 mion florin. I asina genera un solvabilidat positivo di manera ku un bia mas Banko Sentral por duna un permit di banko na Girobank na 2004.
For di 2004 te ku 2010: e banko a krese. Na 2010 ta propone pa trese un akshonista nobo den e banko. E akshonista aki tin un akshonista mayoritario. Esaki ta nifika ku eo tin un influensia grandi riba funshonamentu dje banko. A trata di un grupo di invershonista ku ta usa e nomber di IIG Tof Holding NV. E otro akshonistanan APNA i Pais Kòrsou ta keda. E banko a krese hopi i ta alkansa un eigen vermogen di 120 mion florin.
For di despues dje momentuei , e problemanan ta oumenta durante dje tres añanan ku ta sigi. Por mira ku ta duna hopi fiansa ku no por kobra bèk , e maneho di krédito i di risiko no ta na òrdu. No ta paga fiansanan bèk i tin konsentrashon altu di rísiko riba sektor di aviashon. Ademas no ta sigi instrukshonnan di Banko Sentral.