FLOW, SITKOM a yega na akuerdo pa CAO

Willemstad – Un CAO pa empleadonan di Flow a keda firmá entre SITKOM i tim di maneho di FLOW.

E tim di maneho di Flow, representantenan di SITKOM i otro miembronan di e tim di negosashon tabata presente pa e momento di firma históriko aki, kua ta enfatisá e relashon estrecho entre e sindikato i un di e empleadornan mas grandi di e isla.

Despues di un serie di deliberashon transparente i produktivo entre FLOW i SITKOM, a yega na e CAO kua ta trese benefisionan adishonan pe empleadonan, mientras ku alabes e ta yuda kontrolá gastunan p’e kompania.

“Mi ke gradisí tur partido enbolbí pa e kolaborashon plasentero durante e trayekto aki. Spesialmente na nos partner SITKOM pa e kooperashon i komprenshon mientras nos a enfrenta retonan manera entre otro Covid-19 durante e proseso aki,” Rauf Engels, Direktor Statutario pa Flow Karibe Hulades a indiká.

E CAO ta aplikabel pa empleadonan di Flow na Kòrsou ku a forma parti di e tim di Flow promé ku e atkisishon di UTS, i e esaki a keda firmá pa tres aña.

“Nos ta kontentu pa loke ku nos a logra pa e grupo di empleado aki despues di negosashonnan intensivo. I nos ta satisfecho ku e akuerdo. E trabou no a kaba ainda. Nos lo sigui traha duru pa tur e empleadonan i sigurá ku nos ta representá nan debidamente,” tabata palabranan di señor Farley Felicia, komisario pa SITKOM ku awor ta representá ambos grupo di empleado.