Fiskalia general na Panama a pidi: Pa kuminsá wisio kontra eks presidentenan Martinelli i Varela ku a aseptá soborno di Odebrecht

PANAMA – Na aña 2016 e kompania kontratista Brasileño Odebrecht a keda haña kulpabel den korte di Brooklyn di a distribuí mas ku $788 mion na soborno na gobernantenan korupto den vários pais di Amérika Latina.
Den e kaso aki tin vários presidente a kai será kaba di na Peru i tin kasonan pendiente na Colombia, Costa Rica, Mexico i Panama.
E mandatarionan koruptonan aki a haña nan envolví den e kaso di korupshon di alto nivel di estado.
E gobernantenan tabata laga Odebrecht gana destaho públiko pa konstruí edifisionan pa gobièrnu i drecha kareteranan.
Ministerio públiko na Panama ya kaba tin e dos yunan di eks presidente Ricardo Martinelli (2009/2014) enkarselá kaba na Merka i según investigashon eks presidente Juan Carlos Varela tambe a aseptá plaka di soborno di Odebrecht.
Ta p’esei ayera fiskalia general na Panama a solisitá pa korte federal kuminsá ku un wisio kontra di eks presidentenan Ricardo Martinelli i Juan Carlos Varela.
Ta parse ku den e investigashon ku fiskalia general a hasi tantu Ricardo Martinelli komo Juan Carlos Varela tabata bon na altura kiko tabata pasando.
E dos eks mandatarionan a traha un strukturanan pa e plaka ku Odebrecht mester a paga nan keda depositá den kuentanan bankario den eksterior.
Esaki ta nifiká ku si korte aseptá fiskalia su petishon pronto lo bai tin wisio kontra Ricardo Martinelli i Juan Carlos Varela.