Fiskal Tarek William Saab a bolbe solisitá hustisia Italiano pa ekstraditá Rafael Ramírez

CARACAS – Tarek William Saab fiskal general di Venezuela a bolbe manda un karta di petishon na departamentu di hustisia na Italia pa ekstraditá Rafael Ramírez eks presidente di PDVSA pa Venezuela.
E biaha aki a manda dokumentonan di investigashon di Ministerio Públiko ku Rafael Ramírez a malversá $4.850 mion di PDVSA.
Tarek William Saab den su rueda di prensa ayera a indika ku Rafael Ramírez tabata presidente di PDVSA durante 10 aña i tabatin tur forma pa malversá fondonan di e empresa di estado venesolano.
Den e kaso aki Korte Supremo na Venezuela ta solisitá ekstraditashon di Diego Salazar primu di Rafael Ramírez ku ta radika na Andorra ku tambe ta metí den e kaso di malversashon grandi aki.