Fiskal general na Peru a pidi kastigu di prizon preventivo pa Keiko Fujimori

LIMA – José Domingo Pérez fiskal general na Peru a pidi wes di Korte Supremo di hustisia pa ordená detenshon di Keiko Fujimori di inmediato pa motibu ku tin sufisiente prueba ku e kandidata pa presidensial a risibí plaka di soborno serka Odebrecht.
Ounke ku ofisialmente te ainda no tin un ganador den elekshon presidensial na Peru tòg fiskal general José Domingo Pérez ta di opinion ku ni maske e gana elekshon mes lo tin ku laga enkarselá.
Den e kaso aki e fiskal a splika ku nan tin sufisiente prueba ku Keiko Fujimori a aseptá plaka di soborno
serka un ehekutivo di Odebrecht na Peru.
Pa lokual ta elekshon presidensial na Peru te ainda Pedro Castillo tin un bentaha chikí riba Keiko Fujimori.
Keiko Fujimori a pidi Korte Elektoral anulá votonan di 802 urna ku ta ekivalente na 200.000 voto i si esaki tuma luga elo por gana elekshon debí ku Pedro Castillo tin un bentaha di 71 mil voto aworakí riba dje.
Den e kaso ku si Korte Elektoral anulá tur e votonan aki ta bai nifiká ku Keiko Fujimori lo gana elekshon presidensial pero tòg elo por kai sera konsiderando e petishon di fiskal general José Domingo Pérez.