Fiskal a pidi 12 aña di kastigu di prizon pa Cristina Kirchner

BUENOS AIRES – Ayera fiskal Diego Luciani den Korte a baha pisa riba vise presidente Cristina Fernández de Kirchner despues ku ela presentá un serie di akusashon di korupshon kontra su persona huntu ku tur su eks funshonarionan ku tabata asistié durante su periodo di gobernashon.
Fiskal Diego Luciani a pidi Wes pa inhabilita Cristina Fernández de Kirchner di e kargo di vise presidente di Argentina konsiderando ku e no ta di konfia.
Tin indikashon ku durante periodo di 2003/2015 Cristina Fernández de Kirchner huntu ku su alto funshonarionan di konfiansa a malversá $5.321 mion di estado.
Fiskal Diego Luciani ta konsiderá ku lokual Cristina Fernández de Kirchner a hasi kontra e pueblo di Argentina no meresé pordon. Ta p’esei ela pidi por lo ménos 12 aña di kastigu di prizon i inhabilite di bida for di polítika ku nunka mas elo por goberná na Argentina.
Ayera nochi mes un kantidat bastante grandi di manifestante a bai protesta dilanti residensia di Cristina Fernández de Kirchner eksigiendo pa e baha komo vise presidente di Argentina.
Alberto Fernández presidente di Argentina a emití un komunikado indikando ku tin un persekushon polítiko kontra su ruman i ku elo apoy’é 100 porshento.