Feria di bolo na Tilburg

Djadumingu 31 di òktober último tabata tin un bunita selebrashon na Papiamentu na Tilburg huntu ku pastor Franklyn Brigitha i kor Oonagh & friends. Durante di e selebrashon nos a resa pa tur nos ser kerínan ku a bai nos dilanti. Broeder Rangel tabata sende un bela pa kada un di nan. E momentu aki tabata hopi speshal. E Evangelio a trata e tema pa nos stima Dios riba tur kos i stima nos próhimo manera nos mes. Pastor Franklyn Brigitha a konta den su predikashi ku tabata tin 613 lei kual 365 tabata prohibishon i 248 leinan ku nos por a kumpli kuné. Ta interesante pa mira den e Evangelio kon e doktor di lei ta puntra Hesus kua di e leinan aki ta esun di mas importante i kon Hesus a kontestá bisando stima Dios riba tur kos i stima bo próhimo manera bo mes. Ta bunita pa mira kon e doktor di lei aki no a kontradesí Hesus. I kon Hesus a kontest’é ku e no ta leu for di e Reino di Dios. Ta

Pa nos di Tilburg tabata e promé biaha ku pastor Franklyn Brigitha a hasi misa serka nos. Tur luna pastor Janssen di Heerlen ta nos selebrante. Pastor Janssen ta selebrá tur luna fielmente nos Santa Eukaristia aki na Tilburg. Dor di su ousensia nos a aserká pastor Franklyn i nos ta yama Dios danki ku el a aseptá nos invitashon. Nos siguiente selebrashon ta tuma lugá riba djadumingu 28 di novèmber 2021 i pastor Janssen lo tei bèk komo selebrante.

Despues di e selebrashon nos a hasi apertura na nos Feria di Bolo. E Feria di bolo aki tabata un fundraising pa rekoudá fondo pa asina sigi garantisá kontinuidat di nos misanan na Papiamentu na Tilburg. Nos tabata tin bolo di dadel, chukulati, kashupete, anasa, wòrtel, koko, 3 koló, manteka, pistacho, preimu, kesio i tèrt. Nos a logra bende mas ku 80% di nos bolonan. Esaki pa nos ta un éksito. Nos tabata tin diferente persona ku na un òf otro manera a yuda pa realisá e Feria di bolo aki. Personanan ku a hasi diferente forma di donashon òf a saka man yuda kaminda ku ta tin mester. Nos ta sumamente orguyoso ku nos tin un grupo di persona ku semper ta kla pa yuda. Di e forma aki nos ke yama boso kada un danki. Sin boso sosten nos lo no por a realisá e Feria di bolo aki. Nos misa na Tilburg a bira un komunidat kaminda nos ta trata otro komo famia i nos tei pa otro. E selebrashon aki por mir’é bèk via di nos Live Stream. Via di nos Facebook Page, Komishon Misa na Tilburg por haña e link. Tambe riba e Facebook Page aki por sigui nos i keda na altura di tur nos aktividatnan.