Ferfelu, pero tin di konformá: Patricia, “Patsy” Saturnino a bai laga nos..

Un notisia sigur hopi tristu ta, dje morto di e konosido eks deportista, dirigente i polis Sra. Patricia, “Patsy” Saturnino. Un ratu pasá nos a haña e notisia ku Patricia a bai nos dilanti.
Patricia, o “Patsy” tabata un hende hopi konosí den komunidat, su vínkulonan ku deporte i tambe su karera den kuerpo polisial a hasi di dje un figura hopi konosí.
E la kuminsá ku softball na edat hóben, i a yega di integrá selekshon di softball di nos Pais tambe.
Patsy a fungi tambe komo dirigente di Federashon i na vários okashon a enkabesá delegashon ku a bai representá nos Pais den estranheria.
Último añanan “Patsy” tabata un dje “motornan” tras dje organisashon di sòftbòl slowpitch femenino eksitoso ku ta sbc Nos Goso.
Patricia ta mama orguyoso di Arthur Bonevacio Jr., pelotero estrea di nos ku a hunga pa selekshon lokal i tambe na Ulanda.
Nos tabatin e plaser di tabatin Patricia den Pichingolo, i tambe traha kuné pa un periodo na korant NOBO.
Patricia tabatin algun dia malu, i su kurpa a bai visiblemente atras, i un ratu pasá e notisia a drenta ku ya e no ta huntu ku nos mas.
Deporte 5 Star ta manda palabra di kondolensia pa su famianan, pa tur su amistatnan, i su kompañeronan di trabou. Patsy por tabatin un karakter fuerte, pero tambe un sonrisa kontagioso ku a hasi di dje hopi stimá den su gremio. “Pats” te despues, Gustavo a haña bo kumindamentu !!.
Ounke e realidat ta duru, nos lo tin di konformá i sigui padilanti. I no puntra mas pakiko, ni dikon ???
Paso nos lo no haña e kontesta nunka.
Patsy nos tur sa kubo no tin doló mas, i bo sufrimentu ta tras di lomba.
“Pats” Te Despues !!!
Drumi Dushi !!!