Fasilitashon di invershon dor di gobièrnu ta krusial…. Kambia maneho di ‘tax holiday’ pa pone ekonomía bèk riba pia

WILLEMSTAD – Resientemente por a tuma nota di notisianan sumamente positivo pa loke ta trata rekuperashon serio den aktividatnan ekonómiko den forma di invershonnan di total 250 mion florin den proyektonan di konstrukshon.
Kousa inmediato di esaki ta un kambio ku Minister di Finansa mr. Javier Silvania a introdusí den e maneho di ‘tax holiday’ pa loke ta trata e kondishonnan pa proyektonan ku ta forma parti di nos infrastruktura ekonómiko.
E kambio di maneho aki ta mustra ku si nos ké, nos por.
Pa keda kompletu ta bon pa bisa ku tin algún proyekto atraktivo ku ta den ehekushon aktualmente, mientras ku mester para ketu na e nifikashon di e impaktonan positivo di e kambio den e maneho aki: kaminda Kòrsou mester sigui kompetí internashonalmente pa atraé invershonnan bini aki, nos ta logrando.
Esaki ta nifiká ku divisas ta bini disponibel pa por finansiá importashon nesesario pa e konstrukshonnan, mientras ku e benta di e propiedatnan i nan uso tambe lo generá mas aktividat ekonómiko i divisa.
E proyektonan ta enserá tambe invershon den infrastruktura di tereno, mientras ku e aktividatnan di konstrukshon kuantioso lo trese e aliento -bisa impakto- positivo ku nos tin hopi mester di dje awor aki den e sektor di konstrukshon.
Ta mas ku klaro ku esaki lo tin su impaktonan positivo den otro sektornan di ekonomía i, no na ultimo lugá, riba e lokual ta di sumo importansia pa nos tur, empleo.
Finalmente esakinan tur ta amplia e base ekonómiko i fiskal, kualnan ta kontribuí na finansa públiko.
Ta importante tambe pa realisá ku si e invershonnan no tuma lugá na Kòrsou, pa kual sea e motibunan of argumentonan, nada no ta pasa.
Pues ta importante pa nos tur realisá tambe ku invershonnan den sektornan produktivo ta amplia e base ekonómiko di un pais, kual ta resultá den kapasidat pa realisá un produkshon total mas haltu.