Estudio “Bachelor International Hospitality & Tourism Management” na Universidat di Kòrsou Dr. Moises da Costa Gomez positivamente evaluá dor di NVAO

Ku gran orguyo Fakultat di Siensianan Sosial I Ekonómiko di Universidat di Kòrsou Dr. Moises da Costa Gomez (UoC) ta anunsiá ku su Bachelor International Hospitality & Tourism Management” (IH&TM) a ser positivamente evaluá dor di Nederlands-Vlaamse Accreditatie Organisatie (NVAO). Dor di ofresé e estudio akreditá aki, UoC a bira un di e “stakeholders’ importante tantu lokal komo internashonal den e sektor di hospitality i turismo. E estudio di “bachelor’ ta brinda aspirante studiantenan i profeshonalnan lokal e oportunidat pa studia na UoC i pa despues por okupá posishonnan mas den e sektor.
E programa IH&TM ta un estudio di 4 aña, ku a ser desaroyá basá riba petishon di e sektor di turismo i hospitality. E studiantenan ta risibí un formashon amplio i kaminda ta dediká hopi atenshon na e ‘hospitality mindset’, inovashon i sostenibilidat. Eksperensia práktiko i generá eksperensia den e sektor, ta pará sentral den e estudio aki.
Riba 20 i 21 di yanüari 2022 un pènel internashonal di NVAO a evaluá e programa. E pènel a konkluí ku IH&TM ta kumpli kabalmente ku tur eksigensia di kalidat di NVAO.
Den nan konklushon NVAO ta konstatá entre otro ku e programa di estudio ta up-to-date’, pasombra mayoria di e dosentenan ta traha den e sektor i pues ta na altura di tur desaroyo aktual. E resultadonan di estudio ta kla, transparente i enfoká riba halsa e nivel di pensamentu di e studiantenan.
Tambe NVAO a remarká ku e estudio ta duna e studiantenan mas oportunidat, debí na e kombenionan bon ankrá ku e sektor. Es mas, e programa ta ofresé un programa di guia amplio na e studiantenan.
O sea, e estudio ta kumpli ku tur e puntonan, kual ta dosentenan; profil; resultadonan di estudio; kolaborashon ku e industria, komishon di èksamen i plan di evaluashon.
Studiantenan òf profeshonalnan ku ke risibí mas informashon, por tuma kontakto libremente ku señora Pamela Rusch, programdirector.
Tel: +5999 744-2160
E-mail: pamela.rusch@ uoc.cw
Pa inskribí: www.uoc.cw/application