ESAKI TA E CHÈNS PA KAMBIONAN RIGUROSO I DURADERO DEN KÒRSOU

Ku e situashon sosial na Kòrsou ta unu deplorabel i ku mester aktua rápidamente i trese kambionan profundo, no tin duda. E tema subida di sueldo mínimo ta unu di aktualidat, pasobra Kòrsou a bira insoportablemente karu.

Pero no ta únikamente sueldo mínimo mester konsentrá riba dje, mester wak muchu mas leu. Mester tin atenshon tambe pa e situashon den nos barionan, ku e tantísimo kasnan kibrá i den un mal estado.
E infrastruktura ta totalmente for di òrdu despues di tantu kaida di áwaseru. Hopi áreanan shushi i fis tin kaminda siudadano i empresanan ta laga dùmp shushedat. Aña di limpiesa di bario lo no duna resultado si e no ta kompañá ku un plan nashonal ku ta aksentuá envolvimentu di tur siudadano.
Limpiesa i un estado di higiena haltu den Kòrsou lo surti efektonan konstruktivo, nos hendenan lo ta mas orguyoso di nan isla i lo ta dispuesto pa tené limpi. Ilegalidat ta otro problema serio ku ta asotando nos isla, pa ta eksakto trafikashon di droga i armanan di kandela na gran eskala, anto tambe e kantidat di indokumentadonan ku ta drenta Kòrsou. Kasonan di atrakonan armá no ta pará riba nan mes.
E aktitut i idea di tuma medidanan drástiko i sin mizèrikòrdia no por kontinuá, anto pa kolmo ta sosodé sin kalkulá e efektonan riba sirkunstansia di bida en general. Nos tur a lanta i tende ku ta medida mester tuma, medida, tras medida. Nan a kustumbrá ku ta ekspertonan manera fiskalistanan ta manda, ta komo si fuera ta e gremionan ei so tin tur konosementu i sabiduria, pasobra ta importante kobra belasting. Anto último tempu ta gosa ku ta kobra belasting ku man duru, sin wak mas aleu kiko ta pasando ku pobresa, kantidat di siudadano ku ta bandoná e isla aki ku e propósito pa buska un mihó bida na otro partinan di mundu. Minister di finansa señor Javier Silvania tur dia ta risibí ‘schouderklopjes’, nada kontra, pero what about e otro karteranan? Nunka nos sa papia di (re)konstrukshon di Kòrsou pa e bira un isla atraktivo den Karibe i den mundu. Na Kòrsou no tin e kustumber hasi uzo di sikólogonan, sikiaternan i otro disiplinanan hopi konsentrá riba komportashon i aktitut di hende. Nos pais lógikamente no ta konfrontá ku problemanan kousá pa falta di plaka solamente, awor ta pakiko tòg ta sigui hasi komo si fuera ta plaka so ta konta. Nos Kòrsou ta un teritorio bunita i yamativo, mira nos playanan, e panorama di naturalesa, anto tambe nos hendenan hospitalario i plasentero, pero mester siña balorá nos bentahanan, en bes di pone plaka ariba tur kos. Den tur e momentonan difísil aktualmente ta nesesario pa hasi diferensia, kuminsá atendé e kosnan di otro manera.
No tin sentido pa kontinuá di e mesun manera di tur tempu. Famia, bario, ambiente den skol mester bira puntonan di enfoke pa kambia Kòrsou na su rais.
Mas ku nunka mester para tras di nos produktonan lokal. Ningun pais na mundu no tin ningun chèns di progresá si e no ta wak i pone su propio siudadanonan na promé lugá i sostené loke ta su benefisionan.
Atrobe lo mi ke enfatisá ku no opstante e temporada difísil ku nos ta pasando aden, esakinan ta oportunidatnan di oro pa trese kambio.

Erwin Raphaëla