Entrega di pèrmit di konstrukshon pa Kompleho di Apartamento na Tera Korá

Willemstad – Djamars dia 3 di mei 2022, den oranan di mainta Sra. Caroline Manuel huntu ku Sr. Humphrey Davelaar na nòmber di Minister di Tráfiko, Transporte i Planifikashon Urbano, Sr. Charles Cooper, ku Sr. Raymond Felisie Direktor di Servisio pa Planifikashon Urbano (ROP) a hasi entregá di e pèrmit pa konstrukshon di 72 apartamento, den e bario di Tera Cora, na Sr. Arthur Con, Direktor di Fundashon Kas Popular (FKP)

E kompleho lo konsistí di 6 edifisio di 3 piso, kada edifisio lo kontené 12 apartamento.

Lo konstruí apartamentonan di 2 i tambe di 3 kamber.

E konstrukshon aki tambe lo sosodé di e forma di “gietbouw” kual sistema a demostra di a duna bon resultadonan den kuadro di e rapides ku por konstruí. E bibiendanan aki ta destiná pa hür. Na e kompleho aki tambe lo tin un “beheerder”, kende lo vigilá si e reglanan di e kompleho ta wòrdu kumplí i lo fungi komo e punto di kontakto entre habitantenan i FKP. Meskos ku pa e otro komplehonan, pa yega na remarke pa un di e bibiendanan aki e kondishon di mas importante ta, ku e grupo di kliente mester a pasa den un proseso di preparashon intensivo di 3 luna.

Despues di e trayekto di preparashon e grupo di klientenan ku risibí nan sertifikado ta kla pa habitá e apartamentunan.

Meta prinsipal di e kursonan aki ta pa formá i eduká e habitantenan i yuda nan pa krea un mihó kombibensia den e kompleho di 3 piso.

Gerensia di Fundashon Kas Popular ke gradisí tur servisio i instansha ku a duna nan aporte, di forma ku awe por a logra di risibí e Permit di Konstrukshon.

Tumando na kuenta e nesesidat grandi di kas pa e grupo sosial, esaki ta un granito ku lo duna alivió na 72 famia di e nuebemil i piku ku ta den espera pa un kas riba nos lista.

Fundashon Kas Popular lo vigilá pa tur kos kana bon, tantu durante konstrukshon i despues pa mantené un bario bunita i bibabel.