Enrique Peña Nieto ta impliká den soborno di $6 mion ku Odebrecht

MEXICO – Un grupo di fiskal di Ministerio Públiko tin for di aña 2018 ta investigando un kaso kaminda èks presidente Enrique Peña Nieto i su man drechi Luis Videgaray lo a risibí $6 mion di soborno serka e kontratista brasileño Odebrecht.

Loke a pasa ta ku via di Panama Paper periodistanan Mexicano a bin diskubrí ku Luis Videgaray tin un empresa privá bou di nòmber Latin American Asia Capital Holding i ku a risibí durante un periodo di 2 aña $6 mion na komishon serka e kontratista Odebrecht.

Durante e periodo di gobernashon di Enrique Peña Nieto ela otorgá e kontratista Odebrecht kontrat pa drecha e planta di refineria Miguel Hidalgo situá na Tula.

Tabata trata aki di un trabou ku ta kosta gobiernu mas ku $200 mion i ku chèns pa sigi mantené infrastruktura i tankinan di e refineria durante 10 aña.

Enrique Peña Nieto su abogado ta pretendé ku su kliente no ta metí den ningun tipo di chanchuyo i lo por proba esaki tambe den korte.

E investigashon aki tin un ratu kaba den proseso i ku ta interesante pa wak kiko lo bai pasa ku Enrique Peña Nieto i su sosio korupto.