Lokal
Enfermería mester bai un nivel mas haltu
Tur aña riba día di enfermería mi ta publiká komunikadonan ku mi pensamentunan i filosofía, entorno e profeshon di enfermería. Awe mi ta djis ripiti e disertashon ku mi a publiká 12 di mei 2017, quote:
Awe 9 di mei 2017 mi ke dirigi mi mes na komunidat ku lo sigiente. Dia 12 di mei 2017 un biaha mas ta bai selebra día di enferemería. Kada bes na okashon di tiramentu di ‘speech’ dor di esnan ku ta hiba maneho den diferente institutonan di kuido i tambe dor di gobernantenan, ta mes kansion bo ta tende. Un kansion sin profundidat pa loke ta trata e profeshon aki.
Den kursonan di aña mi a publiká komunikadonan den kual mi a duna mi vishon i profundisá diferente aspektonan ku ta liá ku e profeshon di enfermería. Algun di nan ta;
– E posishon di e enfermera(o) den institutonan di kuido (hòspital et cetera).
– Rekonosementu na diferente enfermera (o)nan, muy en prinsipal esnan ku a traha den St. Elisabeth Hospitaal.
– MI vishon for di 2003 riba hòspital nobo den un nota ku mi a traha pa sindikato CBV titulá, ‘Kaminda tin Boluntat nos ta logra’; Google ‘Felix Pinedo/Waar een wil is is een weg’ of ‘Visies over nieuwbouw ziekenhuis’.
– Mi vishon riba funshonamentu di e hòspital nobo; Google ‘analyse nieuwbouw ziekenhuis’
– Honramentu speshal na zr. Rynia Thijm; Google ‘Voor Rinia Thijm’.
– Honramentu speshal na broeder Edwin Valeriano.
Awendía mi no ta ripará ku tin un vishon riba alsamentu di e profeshon di enfermería. Nos mester kuminsa bandoná e pensamentu ku e enfermera(o) tei pa pasa angúa, baña pashènt et cetera.
Esei ta e loke nos ta yama na Hulandes ‘taakgericht’. Mester kuminsa pensa mas riba e tarea dirigí riba e hende. Kon nos ta mira e hende den su situashon en konekshon ku kuido di salú. Kon nos ta trata ku derechonan di e pashènt pa ku e kuido i trato ku e ta risibi di insitutonan i trahadonan den area di kuido di salú (medikonan, enfermera(o)nan, fisiotherapistanan, dentistanan et cetera).
Na diferente okashon mi a menshoná den mi notanan ku enfermería ta un siensia (wetenschap) riba su mes. Kòrsou for di 1996 a konose su promé enfermera(o)nan ku a graduá komo ‘Master of Science’ den siensia di kuido di salú/enfermería na universidat di Wales (Gran Bretaña). Boso sirbidó tambe tabata forma parti di e grupo selektá aki.
Mi ke duna un rekonosementu speshal aki na mi kasá di felís memoria, Lucinda Pinedo-Smith, ku huntu ku mi persona na 1996 tabata e prome enfermera(o)nan trahadónan di St. Elisabeth Hospitaal ku a gradua komo Master of Science (ekivalente na docterandus).
Lucinda tabata un enfermera i dosente hopi bon den su trabou i tabata ser respetá bou di trahadónan i studiantenan di e diferente skolnan di enfermería.
Nos punto di bista tabata semper dirigí riba elevá e profeshon di enfermería na un nivel mas haltu, p’asina por sirbi nos komunidat mas miho. Por mira ku tur esaki tabata en vano ya ku ahinda e nivel di e profeshon aki no ta kos di kanta makamba.
Nos ta kasi kla ku konstrukshon di un hòspital nobo, pero no ta mira e direkshon ku mester tin pa funkshonamentu di entre otro e profeshon di enfermería.
Aki mi ta pensa riba e asina yama ‘Nurse specialist’ òf ‘Nurse practitioner’ ku ta funshona manera un konsultent pa ku kuido di por ehempel hendenan diabétiko, hendenan ku ta spula nir i kuido speshalisá pa ku heridanan.
Di e manera aki ta aliviá trabou di dòkternan di kas i speshalistanan. Asina tambe ta yuda baha listanan di espera. Tin hopi pa hasi alinda.
Mi ke felisitá tur trahadonan den e area di kuido di salú i kuido sosial ku e dia aki spesial dediká na nan.
Unquote: Esaki ta un komunikado ku mi a publiká riba día di enfermería 2017.
Felix D. Pinedo
Msc in Healthcare/Nursing
Sertifiká den derecho di kuido di salú (Gezondheidsrecht)