Empleado a kobra NAF. 769.330 pa trabou ku nunka a kontraté

WILLEMSTAD. No ta pornada ku inspektornan ulandes ta reklama ku durante e temporada despues di orkan na Sint Maarten ta un fiesta di korupshon tabatin ku plaka di gobiernu i di kompania di gobiernu.
Esei tabata e kaso di un kontroladó di trafiko aereo ku a mira su chèns pe gana un bon sèn di banda i a usa su kompania di limpiesa pa sin kontrat kobra 769.330 ku faktura ku e mes a traha i laga un hefe firma.
Durante e investigashon ela kontesta polis ku e no por duna informashon pasobra hustisia a konfiska su atministrashon debí ku e ta bou di investigashon.
E no por a bisa ken su trahadonan tabata i unda ela kontrata nan.

RETIRO
INMEDIATO
Ante tal situashon gerensia di Juliana Airport no por a hasi otro sino kita e homber foi trabou mesora.
E kontroladó c.q. kontratista di su banda a demanda pa pagé un kompensashon di NAf. 284.340,00 bruto pero abogado di aeropuerto a bisa wes pa manda bai flit.
Wes a splika e homber ku ela faya gravemente dor di keda sin duna informashon i dañando nomber na su doño di trabou riba su negoshi i e investigashon penal.
Kompania no por tin konfiansa den dje i e mester haña retiro e mesora nan a tumé den servisio komo kontroladó di trafiko aereo, no komo empresa di limpiesa.
Naturalmente e no tin nodi di yuda koba su mes tumba pero si e no kopera su doño di trabou por pasa e datonan pa polis i esei ta pió. For di momento ku ela sali liber despues di su detenshon e mester a konta tur kos pero a skonde tur kos.
E homber simplemente no ke kompronde ku ela aktua robes i nunka a pidi diskulpa.
Ku e ta pèrdè su entrada ta logiko pero e por haña trabou komo kontroladó di trafiko aereo otro kaminda. Sintá einan wes a dikta veredikto i a aproba e retiro inmediato.