Emma Coronel kasá di “El Chapo” Guzmán a keda arestá na Merka

NEW YORK – Departamento di hustisia merikano a informá ku Emma Coronel (31) kende ta kasá ku e narkotrafikante Mexicano Joaquín “El Chapo” Guzmán a keda arestá ayera na aeropuerto Dulles International na Virginia. Emma Coronel no solamente ta keda akusá den partisipá den una konspirashon pa trafiká ku kokaina, heroina i mariwana sino ku ademas ta sospechoso prinsipal di a yuda Joaquín “El Chapo” Guzmán hui for di prizon na Altiplano na yüli di aña 2015.

Departamento di hustisia merikano tin konfeshon di otro narkotrafikantenan ku tabata forma parti di e Kartel di Sinaloa ku Emma Coronel a finansiá e huida di Joaquín “El Chapo” Guzmán. Pa lokual ta negoshinan di narkotráfiko di Joaquín “El Chapo” Guzmán Emma Coronel ta sigi gosa normal di tur e benefisionan aki ya ku e ta hiba un bida di selebridat ku plaka di su kasa ku ta enkarselá den un prizon di máksimo seguridat na New York.