Embahada di Paraguay na Colombia a risibí restunan di fiskal Marcelo Pecci

ASUNCION – Outoridatnan internashonal ta tras di esnan ku a asesiná fiskal Marcelo Pecci i outornan intelektual ku a paga pa e krímen horibel aki.
Ta p’esei a subi e rekompensa di $490 mil pa $1 mion pa e informashon ku por kondusí na aresto di esnan involukrá den e kaso di asesinato di Marcelo Pecci aki.
Alicia Zaprisa fiskal general na Paraguay i kolega di Marcelo Pecci a keda enkargá ku e kaso aki a deklará ku ya kaba nan tin indikashon ku ta krímen organisá na Paraguay a ordená pa asesiná e fiskal na Cartagena. Jorge Luis Vargas direktor general di polis na Colombia a konfirmá tambe ku nan ta hañando respaldo di FBI pa logra detené esnan ku a asesiná fiskal Marcelo Pecci pa despues haña sa ken lo ta e outornan intelektual den kaso aki.
E parti ku lo bai yuda den e kaso aki ta ku e sikarionan a bai hür e Seadoo i ku tabatin un kamara di seguridat ku a kapta imáhen di ambos persona.
Empleado ku a hür e Seadoo na e sikarionan a informá polis ku nan a paga pa usa e aparato 2 ora i den apénas 16 minüt despues a bin entregé bek.
Jorge Luis Vargas a bisa ku tin un kaseria humano riba e dos sikarionan aki i ku por garantisá ku na kualkier momentu nan lo detené ambos.