ELIZABETH A REKONOSÉ KU E MESTER DI TRATAMENTU PROFESHONAL

WILLEMSTAD – Kontinuando ku tratamentu di e kaso di persekushon i uzo di arma di kandela ayera den sala di korte, Elizabeth klaramente no ke bisa ken e hòmber kara tapá ta pa motibu di miedu. E akusado Elizabeth Balentina den sala di korte ayera a rekonosé abiertamente ku e ke tratamentu profeshonal di un sikólogo.
El a bisa wes ku e sa tene su problemanan paden i ta p’esei kosnan por eksplotá i sali asina drástikamente fo’i man. Despues di e suseso e ku su ruman Chantal no a papia nunka mas. Den su kaso mayoria biaha ta ora tur kos kaba di pasa e ta realisá kiko el a hasi, pero ya ta lat. P’esei e mes ta rekonosé ku e tin problema serio. Abogado mr. J. Prevo en prinsipio tabata ke pa wanta ku tratamentu di e kaso i warda riba rapòrtnan di un sikólogo i un rapòrt sosial promé. Pero lo a nifiká ku mester warda muchu mas largu pa tratamentu di e kaso aki tuma lugá.
Pa loke ta e deklarashon di tiramentu ku arma di kandela, fiskal señora Tiggelaar a konstatá ku tur e deklarashonnan ta bini di e mesun fuente, esta di e denunsiante Luckert. Pa tal motibu no por balorá e informashonnan aki masha i asina ei konstatá bèrdat ku ta trata aki di intento di maltrato ku arma di kandela òf intento di asesinato. Mester tin prueba kontundente ku a tira dirigí, anto esei no ta e kaso segun fiskal señora mr. Tiggelaar. Hecho ta ku tabatin arma di kandela den e suseso aki i ta e akusado Elizabeth a partisipá aktivamente den e konflikto, koriendo e outo i hibando e tiradó ku e arma di kandela na e sitio. Pa kolmo e akusado Elizabeth no ke menshoná nòmber di e kargadó i tiradó ku e arma di kandela. Mas aleu segun fiskal señora Tiggelaar no tin duda ku Elizabeth Balentina ta kómplise den e suseso aki i tabata debidamente na altura di presensia di un arma di kandela. Elizabeth a mira e arma di kandela i el a puntra si ta arma di bèrdat esaki ta. Na su benefisio tin e hecho ku Elizabeth ta un first offender, ademas fiskal a referí na e sirkunstansia personal di Elizabeth ku sa sufri di depreshon i ta konfrontá ainda ku un parti di su pasado hopi doloroso. Fiskal a rekomendá wes pa rechasá e demanda di daño i perwisio di parti di Luckert. Tambe fiskal a pidi un kastigu di prizon di 18 luna inkondishonal pa Elzabeth Balentina. Abogado mr. J. Prevo a argumentá ku pruebanan di testigunan no tin masha peso, tur ta basá riba loke nan a tende otro hende konta. Wes mr. J. Snitker skuchando tur loke a bini padilanti a yega na un kastigu di prizon di 18 luna di kua 9 kondishonal mará na un periodo di prueba di 3 aña.