Deporte
El a tira 4 inning i duna 1 kareda: Tremendo relevo di “Nene” a duna Pirata triunfo…
Evanon, “Nene” Martis ayera nochi a tira 4 inning briante di relevo pa yuda su tim Sta. Maria Piratas kita un serie for di e tim di Marchena Bravos.
E veterano pitcher Pirata a bai 4 inning, permití apénas 3 hit i 1 kareda pa logra e triunfo pa su klup.
Ruendy Carolina a start pa Sta. Maria, e la tira 3 inning i permití 3 kareda.
Ruwensly Bonifacio tambe a tira bon, sin duna kareda den 2 inning, pa despues entrega e bala na Nene Martis ku a finalisá e partido ku 4 inning di bon trabou.
Reangelo “Bob” Beaumont a bati 2 hit i remolka 2 kareda pa e tim di Vernon Isabella.
Curtje Doran tambe a empuha 2 kareda.
Marchena Braves tabata dilanti den e wega 4-2, pero Sta. Maria a rally pa 5 kareda den di 8 inning pa logra e triunfo. Nan a hinka dos mas den di nuebe.
Perdedo tabata Richard Moesker III.
E la tuma 3 kareda den 1 tèrsio di inning.
Rainer Polonius a bati di 4-2 pa Marchena.
· Baseball doble A ta kontinuá awe nochi den Tio Daou Ballpark u e wega entre Sta. Rosa Indians vs Firebirds.