Eksposishon UNESCO Curaçao den kuadro 10 aña Miembro Asosia Unesco

Willemstad. Komishon Nashonal UNESCO pa Kòrsou a selebrá 10 aña miembro afiliá na UNESCO komo Miembro Asosiá.  Den kuadro di esaki UNESCO Kòrsou a hasi apertura di un Eksposishon na Biblioteka Nashonal di Korsou Dr. Frank Martinus Arion bou di e tema “Reflekshon riba 10 aña Miembresia na UNESCO”.

Apertura tabata na enkargo di Minister di Enseñansa, Siensia, Kultura i Deporte Sithree van Heydoorn i Sekretario General di UNESCO pa Kòrsou Marva Browne den presensia di entre otro Sekretarionan General di Aruba i St Maarten i tambe eks minister Jacques Veeris ku na 1983 tabata e minister enkargá ku UNESCO i ku a papia pa promé biaha na e di 22 Konferensia General na nòmber di Gobièrnu  di Antias Hulandes.

Despues ku Antias Hulandes na 1983 a bira e promé Miembro Asosiá di UNESCO, Kòrsou despues di optené su status autónomo den Reino na 2010 a apliká via di Hulanda pa bira Miembro Asosiá. Durante su di 36 Konferensia General riba 25 di október 2011 Kòrsou pa aklamashon a bira e di 7 Miembro Asosiá di UNESCO.

Den kuadro di e 10 aña di miembresia asosiá, na yanüari último a lansa aktividatnan riba Dia Internashonal di Edukashon pa pone atenshon riba e fecha aki. Banda di e apertura ofisial Gobièrnu di Kòrsou a duna rekonosementu na e promé Sekretario General Frank Elstak ku tabata instrumental den e preparashonnan pa bira miembro asosiá. Loke hopi no sa tambe ta ku Sr. Elstak tabata e motor tras di pone Kòrsou riba e Lista  di Patrimonio Mundial di UNESCO. Eks Minister Jacques Veeris tambe a risibi rekonosementu pa su parti den e proseso.

E eksposishon ta habrí pa públiko for di 26 di òktober te ku 6 di novémber 2021 di djaluna pa djabièrne 8 or – 4.30 i djasabra di 9.30 or pa 1 or. Pueblo di Kòrsou ta kordialmente invite pa bishitá e eksposishon I pa asina mira kiko UNESCO den e ultimo 10 aña a hasi i ta nifiká pa pais.