Eksibishon “JJS LIFE MATTERED”

Willemstad-Resietemente Fundashon DOJACMC (Development of Jazz and Creative Music Curacao) huntu ku Archivo Nashonal a habri porta pa e eksibishon titulá “JJ’s Life Mattered” den presensia di famia Willekes i invitadonan selektá.
Esaki ta e promé biaha den historia di e archivo ku ta presentá un eksibishon históriko di un Yu di Kòrsou riba e tereno di musika di Jazz. John James “JJ Cool” Willekes Jr. ku a nanse na 1956 i fayesé na 2019 i su mayornan ta John James “Jimmy Boy” Willekes, Sr. i Sra. Anna Willekes.

Segun e ko-fundador i presidente di DOJACMC, Sra. Edna Monifa “Lady Mo” Willekes-King, e propósito di e eksibishon aki ta pa pone lus riba e talentonan ekstra ordinario, karera i herensia di su defuntu kasá por medio di portretnan i presentashonnan audio visual, selektá di mas ku 30 aña di trabou, esfuerso i e filosofia di músika den e mundu di Jazz na Kòrsou i Internashonal .
E konsepto di e eksibishon ta un kreashon original di diseñado Sra. Willekes- King. Direkshon artístiko tabata na enkargo di archivista Casper Martens i fotógrafo Francis Ramazan tabata tin e preparashon i montura di e portretnan na su enkargo. E ekspo aki ta un kontinuashon di e selebrashon di UNESCO su 10 aña di Dia Internashonal di Músika di Jazz 2021. E video produsí pa JJ Cool i Lady Mo i dediká na e legendario pelotero di Kòrsou Adrew Jones – “Yambo Slam”, i e poster di e prome Festival di Jazz organisá pa e prome Fundashon di Jazz na Kòrsou tambe ta forma parti di e eksibishon aki. E kantante i personalidat di televishon Merietza Haakmat a sirbi komo presentador. Oradornan invitá tabata Lizette Sambo-Velder – Dir. di Sektor Kultura i Deporte, e dekano di e Fakultat di Arte di UoC Adriana Fernandez, Rob de Lannoy – e prome sekretario di e prome Fundashon di Jazz Korsou i Dimitri Cloose presidente di Fundashon NAAM. E David “Ronchi” Mathews Band a trese un selekshon di piesa dediká na e memoria di e defuntu saksofonista John James Willekes Jr. Un anochi ameno yen di nostalgia, ku un ambiente ku a kumpli ku e reglanan stipulá pa ku Covid -19.
Gradisimentu ta bai pa tur sponsor i kolaborado ku a yuda di un forma of otro pa engrandesé e apertura ofishal. Por disfruta i eksperensia e eksibishon di JJ’s Life Mattered te ku fin di óktober 2021. Pa mas informashon por yama 4614866 of manda un email na nationaalachief @gobiernu.cw Entrada ta grátis.