Eks sekretario di presidensia di Peru a entrega na hustisia

LIMA – Bruno Pacheco eks sekretario di presidensia di Peru ku tabata un di e hòmbernan mas buska pa hustisia di e pais a entrega su mes ayera.
E motibu dikon hustisia na Peru tabata tras di Bruno Pacheco ta debí ku e tabata relashoná ku e eskandalo
di presunto kaso di korupshon huntu ku e mandatario Pedro Castillo.
Bruno Pacheco a disparsé na momentu ku a gar’é ku $20.000 na efektivo den su ofisina na palasio presidensial.
Patricia Benavides fiskal general di Ministerio Públiko a indiká ku Bruno Pacheco a keda 103 dia profugo di hustisia i ku e mester duna kuenta i rason di vários akusashon ku tin den su kontra.
Bruno Pacheco lo keda detené bou di kustodia polisial i lo tin ku keda interogá pa fiskalnan di Ministerio Públiko e siman aki mes.
Patricia Benavides a splika ku Bruno Pacheco lo por ta e solushon pa e kantidat di kasonan di korupshon ku tin pendiente kontra di presidente Pedro Castillo.