Eks presidente di Bolivia Jeanine Añez a purba kometé suisidio den prizon

LA PAZ – Jeanine Añez eks presidente Interino na Bolivia ku ta bou di detenshon preventivo den Sentro Penitensiario Femenino de Miraflores a trata di kometé suisido djasabra mardugá segun fuentenan ofisial.
Luis Arce presidente di Bolivia mes a tene un rueda di prensa ayera pa informá e pueblo Boliviano ku e ta lamentá ku señora Jeanine Añez a trata na kometé suisidio den prizon.
Jeanine Añez a keda detené for di 13 di mart último i fiskalnan di Ministerio Públiko na Bolivia tin vários kargo bastante pisá den su kontra ku por kondusí na bastante aña di kastigu di prizon.
Jeanine Añez ta akusá di partisipá den un gòlpi di estado pa baha Evo Morales na 2019 i ku den e proseso aki vários hende a pèrdè nan bida.
Jorge Valda ku ta representante legal di Jeanine Añez ta para firme ku su kliente no a partisipá den ningun gòlpi di estado i e ta garantisá ku e ta un víktima di un persekushon polítiko.