Eks paramilitar Colombiano “Jorge 40” a rekonosé ku ela asesiná 14 persona

BOGOTA – Rodrigo Tovar Pupo, alias Jorge 40 eks hefe paramilitar a aseptá su responsabilidat den asesinato di 14 persona i otro krímennan manera narkotráfiko, sekuestro i maltrato ku a tuma lugá entre 2000/2005.
Ta konosí ku Rodrigo Tovar Pupo, alias Jorge 40 a keda ekstraditá pa Merka na aña 2008 pa su partisipashon di narkotráfiko di toneladanan di droga pa Merka.
Awor ku Rodrigo Tovar Pupo, alias Jorge 40 a kaba di kumpli ku su kondena na Merka a keda ekstraditá bek pa Colombia kaminda e mester bai duna fiskalia general kuenta i rason di lokual ela hasi durante tempu ku e tabata eks paramilitar.
Naturalmente servisio di Inteligensia na Colombia tin detayenan di lokual Rodrigo Tovar Pupo a hasi pero tabata kier pa e mes atmití su krímennan ku ela kometé.
Den e kaso aki Rodrigo Tovar Pupo a konfesá na fiskal general na Colombia di e 14 hende ku ela asesiná. Komo parti di e akuerdo ku gobièrnu a drenta ku eks geriyeronan Colombiano elo por sali liber.
Pero manera tin entendi den e kaso aki ta ku lidernan manera Rodrigo Tovar Pupo lo a pèrdè e benefisio aki.
Chèns ta grandi ku Rodrigo Tovar Pupo lo por keda kondena na 8 aña di kastigu di prizon.