Èks doño di Plantage Jeremi kier a kobra Pensioenfonds NAf 485.575,-

WILLEMSTAD. Korte di Hustisia a rechasá un demanda di e doñonan ku a bende Plantage Jeremí ku Fondo di Penshun APC pa paga e suma di Naf. 485.575,- na interes i but pa tardansa den pago di e suma prinsipal di 7.6 mion florin pe tereno di 62 hèktar na aña 2017.
APC no a paga doñonan dje plantage na pasamentu dje akta notarial manera ta kustumber den transakshon di inmobilario pero a pasa 6 luna promé ku APC a pasa e plaka riba kuenta dje doñonan.
Despues ku APC a paga e doñonan, a dura te dos siman pasá pa un desishon final a kai den Korte di Hustisia ku Fondo di Penshun a gana e kaso i no tin nodi di paga e suma di
485.575 komo un sorto di daño perwisio.
Esensia dje kaso ta ku doñonan dje plantage a bende i a entrega e tereno di Jeremí ku Fondo di Penshun for di 6 yuni 2017 pero a risibi e pago te dia 15 di november di 2017.
Den promé instansia wes a rechasá e demanda dje doñonan di Jeremí pasobra e fecha di pago no a hunga un papel asina preponderante den e transakshon.
Dia 11 di yanuari 2021 a trata e apelashon di Jeremí APC i nan a pidi wes pa anulá e kondena kontra Jeremí.

PRE-HISTORIA
I KULMINASHON

Doñonan di Plantage Jeremi promé ku 2016 tabata bende pida-pida tereno ku diferente hende.
Fin di 2016 e doñonan dje tereno tabatin un debe hipotekario i e instansia ku nan tabata debe a kumbini ku nan ku si promé ku 10 yuli di 2017 nan paga un sierto montante, portador dje hipoteka lo pordoná nan parti dje debe.
Pero pa kada luna ku nan no paga e debe na tempu nan ta pèrdè 100.000 florin na but.
Naturalmente APC a pone un seri di kondishon pa despues nan no haña nan ku doño di tereno ku ta bin reklama nan.
Un dje kondishonnan tabata ku e tereno mester ta liber di kualke beslag of debe.
Apesar ku e doñonan original a atverti APC ku a pasa akta i nan no a paga, e daño perwisio no a drenta i nan a bai korte.
Den korte e èks doñonan a bolbe e kaso di manera ku e sosiedat ku a kumpra Jeremi por anda ‘vrij en blij’ ku e tereno.