Eks bòksdó di peso pisa detené pa kargamentu di 22 tonelada di droga

MIAMI – Ayera agentenan federal a detené Goran Gogic (43) un eks bòksdó di peso pisa relashoná ku un mega kaso di trafikashon di droga.
E aresto a tuma luga na e aeropuerto Internashonal di Miami nèt na momentu ku e tabata bai biaha pa San Juan Puerto Rico.
DEA ta akusá Goran Gogic di ta responsabel pa introdusí un kantidat di 22 tonelada di kokaina ku tabata depositá den un depósito na Brooklyn.
Lisette Reid wes federal di Korte na Miami a ordená pa detené Goran Gogic i atendé ku tur e dokumentonan pa asina sòru pa promé ku dia 7 di novèmber ekstradite pa New York.
Abogado Lawrence Hashish ku ta defendé Goran Gogic a bisa ku su kliente no ta ni biba na Merka te pa e ta metí den un negoshi asina grandi di trafikashon di droga.
E hurista ta bai presentá prueba den korte ku Goran Gogic tabata na Miami komo un promotor di bòkseo.
Aparentemente Goran Gogic a muda pa Europa for di dos aña pasa i ku no kier sa nada mas di Merka.