Internashonal
Eks agente di FBI akusá di soborno huntu eks gobernadora di Puerto Rico a bai entrega
SAN JUAN – Mark Rossini eks agente di FBI ku a keda akusá ofisialmente di ta metí den e kaso di korupshon huntu ku Wanda Vázquez eks gobernadora di Puerto Rico a bai entrega na hustisia ayera.
Tin indikashon ku Mark Rossini a biaha for di Madrid pa San Juan pa bin duna su deklarashon na outoridatnan di Ministerio Públiko na Puerto Rico.
Wes Camille Vélez Rivé di korte Federal na San Juan a aseptá pa Mark Rossini paga un fiansa di $50.000 pa asina keda den libertat kondishonal te na momentu ku su kaso keda presentá den korte pa dia 20 di Ougùstùs próksimo.
Fiskal general a akusá Mark Rossini di tabata intermediario entre e bankero venesolano Julio Herrera Velutini doño di Bancrédito International Bank i eks gobernadora Vázquez .
Ta sospecha ku via Mark Rossini a finansiá kampaña di eks gobernadora Vázquez ku un montante di $300 mil.
Wes Camille Vélez Rivé a duna Mark Rossini pèrmit pa regresá Spaña bek debí ku e ta bou di tratamentu médiko debí ku e tin kanser.