Efekto di konfiská droga pafo di awanan teritorial ku no ta distiná pa Kòrsou

WILLEMSTAD. Den un karta ku e parlamentario Sheldry Osepa a manda pa minister di Hustisia Shalten Hato, ela pidi su atenshon pe hecho ku ultimamente Warda Kosta ta interseptando kandidat masha grandi di droga pafo di nos awanan teritorial.
Asina a sali siman pasa ku Warda Kosta a interseptá un kantidat di 1620 kilo di kokaina.
Djís un luna promé ku esei Warda Kosta a kue alrededor di 1000 kilo di kokaina.
Djís prome ku esei Warda Kosta a interseptá un lancha ku 650 kilo di kokaina.
E temporada kòrtiku i tambe e kantidat grandi di droga ta duna indikashon ku tin un desaroyo nobo rondo di nos awanan teritorial.
Ta konosí ku e gran kantidat di droga ku Warda Kosta ta konfiská, no ta destiná pa Kòrsou.
Ta e úbikashon di nos pais ta hasi Kòrsou atraktivo pa rondo di nos awanan sigui transportá droga pa Merka i tambe Oropa.
Pa por pèrsigui, interseptá, detené, konfiská e droganan i pèrsonanan Warda Kosta ta usa komo base legal e asina yama Tratado di San José.
E tratado ta brinda oportunidat na e region di Karibe pa traha huntu, ku mesun meta i tambe operá mas miho kontra transporte ílisito di droga.
Esaki riba su mes ta positivo.
Sinembargo Kòrsou tin algun problema partikular. Manera ta ampliamente konosí hopi di e pèrsonanan ku wòrdu detené pafo di nos awanan teritorial nunka tabata tin interés pa bini Kòrsou.
Nan intenshon tabata pa yega Merka.
Tin biaha tambe pa konsidensia e lancha tabata nabega den direkshon di awanan di Kòrsou, kual ta duna autoridat na Warda Kosta pa interseptá e lancha.
Tur e pèrsonanan ku wòrdu detené mester sinta nan kastigu na Kòrsou.
Tur esaki mientras e situashon di nos prison ta deplorabel.
Esaki ta trese un karga finansiero pisa pa nos prison i nos pais ku nos mester evalua kontinuamente.