Edward, “Chu” Martis ta konfirmá: “Sèn no tei pa paga ticket !!”…

• E máksimo dirigente di nos sòftbòl Sr. Eduard, “Chu” Martis a konfirmá ku ainda no tin plaka pa paga e tíketnan pa nos selekshon di softball femenino fastpitch bai Virgin Islands pa kompetí den e kompetensia di Confederashon di Islanan di Caribe Ingles di Softball.
E kompetensia ta di 1 di mart pa 5 di mart na Virgin Islands.
E paisnan ku a konfirmá ta: St. Maarten, Isla Virgenes Britániko, Jamaica, Aruba, Kòrsou i naturalmente Virgin Islands Merikano.
E ganadó dje kompetensia na Virgin Islands lo klasifiká direkto pa Juegos Centro Amerikano y del Caribe na El Salvador e aña aki. Manera ta konosí nos selekshon mester a bai kampeonato Panamerikano na Guatemala, pero nos no a bai i a skohe pa bai Virgin Islands kaminda ku e ruta pa Juegos ta mustra mas fásil.
Sinembargo ainda faltando mas o ménos 1 luna pa bai, i ku selekshon ya definitivo no tin sèn pa paga e “tíketnan”.
Deporte 5 Star a kombersá ku e máksimo dirigente di CSB ku ta Sr. “Chu” Martis ku a konfirmá e informashon ku nos tin.
Sr. Martis a bisa 5 Star ku e no ke kulpa niun hende, pero ku e situashon ta ferfelu i ku mas tarda, mas karu e preis dje “tíketnan” lo bira. Sr. Martis a bisa 5 Star ku FDOK no tabatin sèn pa bai Panamerikano den luna di sèptèmber. I hasta CSB a keda ku debe relashoná ku e partisipashon di nos selekshon na Argentina.
E delegashon ku mester bai Virgin Islands ta konsistí di 24 persona.
Preis di pasashi tabata $ 1.150 pa persona. I mas bo tarda pa paga mas e preis subi.
Segun e máksimo dirigente di nos softball fastpitch e petishon di sèn ta serka gobièrnu.
Sr. Martis a rekonosé ku no ta fásil, paso pabo prepará bon ta eksigí sèn. CSB a drai e preparashon manera por, paso no tin plaka.